“ከታላቁ የህዳሴ ግድብ አሁንም ዓይናችንን ለአፍታ አንነቅልም” ሜጄር ጀኔራል ይልማ መርዳሳ

“ከታላቁ የህዳሴ ግድብ አሁንም ዓይናችንን ለአፍታ አንነቅልም” ሜጄር ጀኔራል ይልማ መርዳሳ

ባሕር ዳር፡ ሐምሌ 15/2013 ዓ.ም (አሚኮ) “ከታላቁ የህዳሴ ግድብ ዓይናችንን ለአፍታ ሳንነቅል ደኅንነቱን እየጠበቅን እንገኛለን” ሲሉ የኢፌዴሪ አየር ኃይል ዋና አዛዥ ሜጄር ጀኔራል ይልማ መርዳሳ ተናገሩ።

የኢፌዴሪ አየር ኃይል መንግሥት በሚሰጠን ትእዛዝ መሰረት ሀገር ለማፍረስ በሚጥር የትኛውም ኃይል ላይ በሚፈለገው ቦታና ጊዜ ጥቃት ለመፈጸም ዝግጁ መሆኑንም ጨምረው ገልጸዋል።

ሜጀር ጄኔራል ይልማ መርዳሳ እንደተናገሩት፤ ከታላቁ የህዳሴ ግድብ ጋር ተያይዞ የተከሰቱ የውጭ ጫናዎችና የውስጥ ትንኮሳዎች የኢትዮጵያ ወቅታዊ ፈተናዎች ኾነው ቆይተዋል።

“ኢትዮጵያ በቀጣናው ያላትን ተጽእኖ የማይፈልጉ የውጭ ኃይሎች ከውስጥ ባንዳዎች ጋር ተቀናጅተው የተለያዩ ጫናዎችን ሲያደርጉ ቆይተዋል” ነው ያሉት።

የእነዚህ ኃይሎች ዋነኛ ዓላማ የኢትዮጵያ ሕዝብ በራሱ ወጪ እየገነባው ያለው የህዳሴ ግድብ ማስቀረት መሆኑንም አስረድተዋል።
ከዚህ አኳያ የታላቁ ህዳሴ ግድብ ሁለተኛ ዙር የውኃ ሙሌት በስኬት መጠናቀቁ ለኢትዮጵያውያን ልዩ ትርጉም እንዳለው ጠቅሰዋል፡፡ ድሉ መንግሥትና ሕዝብ አንድ ሆነውና ተናበው ከሰሩ ምን መፍጠር እንደሚችሉ አመላካች መሆኑን አብራርተዋል።

የታላቁ ህዳሴ ግድብ ሁለተኛው ዙር ውኃ ሙሌት በስኬት መጠናቀቅ በተለይ ሌት ተቀን ግድቡን እየጠበቀ ላለው የኢፌዴሪ አየር ኃይል ልዩ የደስታ ስሜት እንደፈጠረም ተናግረዋል።

አየር ኃይላችን በግድቡ ላይ ሊጋረጡ የሚችሉ “ውጫዊ ስጋቶችን ጠንቅቆ ይገነዘባል” ያሉት ሜጄር ጀኔራል ይልማ፤ በዚህም “ዓይናችንን ከግድቡ ላይ ለአፍታ ሳንነቅል ደኅንነቱን የመጠበቅ ተልዕኳችንን እንወጣለን” ብለዋል።

መንግሥት በትግራይ ክልል ሀገር ለማፍረስ ሲንቀሳቀስ በነበረው አሸባሪ ቡድን ላይ በወሰደው የሕግ ማስከበር እርምጃ የኢፌዴሪ አየር ኃይል አበርክቶ ጉልህ እንደነበርም ነው ሜጄር ጀኔራል ይልማ መርዳሳ ያስታወሱት።

ለሀገርና ሕዝብ ጥቅም ዴንታ የሌለው አሸባሪ ቡድኑ “ሀገር ለማፍረስ በተደጋጋሚ ሞክሮ አልተሳካለትም፤ አሁንም በሚችለው አቅም ሙከራ እያደረገ ይገኛል” ብለዋል።
በመሆኑም አየር ኃይሉ ከመንግሥት በሚሰጠው ትእዛዝ መሰረት ሀገር ለማፍረስ የሚጥሩ ኃይሎች ላይ በየትኛውም ቦታ ጥቃት ለመፈጸም ከመቼውም ጊዜ በላይ ዝግጁ መሆኑንም ገልጸዋል።

የኢፌዴሪ አየር ኃይል የትኛውንም የህልውና አደጋ ለመቀልበስ ከመቼውም ጊዜ በላቀ ቁመና እና ሥነ-ልቦናዊ ዝግጅት ላይ እንደሚገኝም ሜጄር ጀኔራል ይልማ ተናግረዋል።

የመከላከያ ሠራዊት ከየትኛውም የፖለቲካ ወገንተኝነት ነጻ በሆነ መልኩ የኢትዮጵያን ሉዓላዊነት እንዲጠብቅ ተደርጎ መደራጀቱን የገለጹት ዋና አዛዡ፤ የኢፌዴሪ አየር ኃይል ከዚህ አኳያ የሰው ኃይል ግንባታን መሰረት ያደረገ ውጤታማ የሪፎርም ሥራዎች መከናወኑን ተናግረዋል።

በለውጥ ሥራዎች አማካኝነትም ወቅቱን የሚመጥን ብቁ የሰው ኃይል ማፍራት እንደተቻለ ጠቅሰዋል፡፡ የለውጥ ሥራው ተጠናክሮ እንደሚቀጥልም ነው የገለጹት።

ኢትዮጵያውያን በየትኛውም ግዳጅ ላይ ለሚገኝ የመከላከያ ሠራዊት አባላት እያደረጉት ያለውን ድጋፍ አድንቀዋል፤ ይህ ተግባር ተጠናክሮ እንዲቀጥል ሜጄር ጀኔራል ይልማ ጥሪ ማቅረባቸውን ኢዜአ ዘግቧል፡፡

ተጨማሪ መረጃዎችን ከአሚኮ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡
ዩቱዩብ https://bit.ly/2RnNHCq
በዌብሳይት amharaweb.com
በቴሌግራም https://bit.ly/2wdQpiZ
ትዊተር https://bit.ly/37m6a4m

Source link

The post “ከታላቁ የህዳሴ ግድብ አሁንም ዓይናችንን ለአፍታ አንነቅልም” ሜጄር ጀኔራል ይልማ መርዳሳ first appeared on Satenaw Ethiopian News/Breaking News.

The post “ከታላቁ የህዳሴ ግድብ አሁንም ዓይናችንን ለአፍታ አንነቅልም” ሜጄር ጀኔራል ይልማ መርዳሳ appeared first on Satenaw Ethiopian News/Breaking News.

Source: satenaw.com

“ከታላቁ የህዳሴ ግድብ አሁንም ዓይናችንን ለአፍታ አንነቅልም” ሜጄር ጀኔራል ይልማ መርዳሳ