GENERAL ATOMICS MOJAVE: ප්‍රිඩේටර් ඩ්‍රෝන් එකේ නපුරු පොඩි මල්ලි


ප්‍රිඩේටර්, රීපර් වගේ ඩ්‍රෝන් ගැන ඔයලා අහලා තියෙනවා. ඒ දෙකම දැන් අවුරුදු 20ක් විතර පරණ, ඇමරිකාව ලෝකෙ පුරා කරපු නිළ හා නිළ නොවන යුද්ධ ගණනාවක hunter-killer missions වල යොදවලා තිබුණ යානා. දහස් ගණන් ත්‍රස්තවාදීන් වගේම, වැරදි ඉලක්ක කිරීම්, නොසැලකිලිමත් කම වගේ හේතු නිසා අහිංසක සාමාන්‍ය මිනිස්සු දහස් ගණනකගේ මරණ වලටත් මේ දෙකම වගකියන්න ඕනෙ කියල, ඇමරිකාවේ ඩ්‍රෝන් යුද්ධ ගැන අධ්‍යයනය කරන පර්යේෂකයින් කියනවා.

රීපර් හා ප්‍රිඩේටර් යානා දෙකම නිර්මාණය කරපු ඇමරිකාවෙ ජෙනරල් ඇටොමික්ස් සමාගම, දැන් මොහාවි (Mojave) නමින් අලුත්ම ඩ්‍රෝන් එකක් නිර්මාණය කරමින් සිටිනවා. බැලූ බැල්මට රීපර් එකක, නැතිනම් ප්‍රිඩේටර් එකක බාහිර පෙනුම තිබුණත් තවම සංවර්ධන අවස්ථාවේ (development phase) තිබෙන මේ යානයේ වෙනස්කම් රැසක් තියෙනවා

ජෙනරල් ඇටොමික්ස් CEO ලින්ඩන් බ්ලූ කියන විධියට මේ යානයේ වැදගත් වෙනස් කම්;

1] කෙටි ධාවන පථවලින් ගුවන්ගත වීමේ හැකියාව

2] ගැටුම් පවතින ප්‍රදේශවල (conflict zones), පහසුකම් අඩු, රළු ගුවන්පථ හෝ තාර පාරවල් වලින් ගුවන්ගත වීමට හැකිවීම

3] ඉතාමත්ම අඩු පහසුකම් ඇති, තාවකාලික ගුවන්පථවලට ගොඩබැස, ඉතා ඉක්මණින් ඉන්ධන හා ආයුධ ලබාගෙන නැවත ගුවන්ගත වීමේ හැකියාව

4] ඉතා දීර්ඝ කාළයක් ගුවනේ රැඳීසිටිමින් නිරීක්ෂණය කිරීමේ හැකියාව

මොහාවෙ යානයට හෙල්ෆයර් මිසයිල 12ක් හා කැමරා උපාංග රැගෙන මීටර් 300ක් තරම් කෙටි ධාවන පථයකින් ගුවන්ගත වෙන්න පුලුවන්. පරණ රීපර් ඩ්‍රෝන් එකට අඩුම ගානේ මීටර් 1000ක ගුවන් පථයක් අවශ්‍ය වෙනවා.ඒවගේම ඒ ආයුධ තොගයත් සමග ඉලක්කය තහවුරු වනතෙක් පැය 25ක් ගුවනේ රැඳී ඉන්නත් මොහාවේ ඩ්‍රෝන් එකට පුලුවන්.




Source: vidya gaweshana

GENERAL ATOMICS MOJAVE: ප්‍රිඩේටර් ඩ්‍රෝන් එකේ නපුරු පොඩි මල්ලි